Wise einn af aðalstyrktaraðilum Nordic Women in Tech Awards

Það var okkur hjá Wise sannur heiður að taka þátt í og styrkja hina glæsilegu verðlaunaafhendingu Nordic Women in Tech Awards sem haldin var í Hörpu 9. nóvember. Wise var einn af aðalstyrktaraðilum hátíðarinnar og sóttu fulltrúar okkar gala kvöldverð þar sem úrslitin voru kynnt.

Nordic Women in Tech Awards verðlaunin eru haldin árlega og voru nú í fyrsta sinn haldin á Íslandi. Sjálfboðaliðar á vegum hinna fjölmörgu samtaka sem stóðu að hátíðinni sáu til þess að Harpa skartaði sínu fegursta. Á hátíðinni var samankomið fólk af öllum Norðurlöndunum gagngert til þess að fagna framúrskarandi konum í tæknigeiranum.

Kastljós á framlagi kvenna í tækni

Tilgangur verðlaunanna sjálfra er að sýna kraft og árangur kvenna í tæknigeiranum, varpa verðskulduðu kastljósi á ótrúlegt framlag kvenna í tækni og jafnframt hvetja og styrkja komandi kynslóðir frumkvöðla.

Á kvöldinu sjálfu voru heiðraðar fjölmargar konur og samtök á Norðurlöndunum, þar á meðal Safa Jemai, framkvæmdastjóri og stofnandi Víkonnekt, sem var valin rísandi stjarna ársins. Eliza Reid forsetafrú Íslands og Áslaug Arna Sigurbjörnsdóttir háskóla-, iðnaðar- og nýsköpunarráðherra fluttu hrífandi erindi. Sendiherrar og sendifulltrúar allra Norðurlandanna voru einnig viðstaddir ásamt fjölmiðlafulltrúum og fulltrúum Íslandsstofu, sem var einn af lykil samstarfsaðilum hátíðarinnar.

Þrátt fyrir mikil framfaraskref á undanförnum árum er enn langur vegur í að sönnu jafnrétti sé náð í tæknigeiranum. Wise leggur sig fram um að styrkja og styðja við jöfn tækifæri allra kynja í tæknigeiranum og Nordic Women in Tech Awards var frábært tækifæri til að sýna það í verki. segir Ólöf, markaðsstjóri Wise.

Kraftur meðal verðlaunahafa

Einstaklega lærdómsríkt var að heyra frá hinum fjölmörgu flottu fyrirlesurum sem fluttu erindi og sjá þann kraft sem var áberandi meðal þátttakenda og verðlaunahafa. Við óskum öllum þeim einstöku konum sem tóku á móti verðlaunum innilega til hamingju með sitt framúrskarandi framlag til tækniiðnaðarins.