Ekki verður af sameiningu Advania og Wise

190123 wise logo hreint 800

Advania dregur til baka samrunatilkynningu vegna kaupa félagsins á Wise í kjölfar frummats Samkeppniseftirlitsins um skaðleg áhrif samrunans á samkeppni. 

Samkeppniseftirlitið hefur síðan í september 2018 haft til rannsóknar fyrirhuguð kaup Advania hf. á Wise lausnum ehf. Advania tilkynnti í september um kaup á hugbúnaðarfyrirtækinu Wise lausnum. Samkomulag um kaupin hafði náðst við eiganda Wise, AKVA Group í Noregi. Ætlunin var að sameina Advania og Wise og styrkja stöðu þeirra í síharðnandi alþjóðlegri samkeppni um viðskiptahugbúnað. Kaupin voru hins vegar háð samþykki Samkeppniseftirlitsins.

Frummat Samkeppniseftirlitsins benti m.a. til þess að eftir samrunann hefði hið sameinaða fyrirtæki verið með um og yfir helmingshlutdeild á markaði fyrir þróun, sölu og þjónustu við fjárhagskerfi á Íslandi og að samrunaaðilar væru nánir keppinautar. Vegna þess tilkynnti Samkeppniseftirlitið samrunaaðilum í byrjun þessa mánaðar það frummat sitt að grípa þyrfti til íhlutunar vegna skaðlegra áhrifa samrunans á samkeppni. Nú í dag hafa samrunaaðilar tekið formlega ákvörðun um að draga tilkynningu sína vegna samrunans til baka. Með því er rannsókn eftirlitsins á viðskiptunum lokið.

Nánari upplýsingar má finna í fréttatilkynningu Samkeppniseftirlitsins.