Forritarar framtíðarinnar heimsóttu Wise

IMG 1254 small

Wise tók á móti 22 stelpum úr Valhúsaskóla og kynnti fyrir þeim fyrirtækið og starfsfólk. Heimsóknin er liður í alþjóðlegu verkefni sem Háskólinn í Reykjavík leiðir hér og er átak til að hvetja konur til náms í tæknigreinum. Hluti af því er verkefnið „Stelpur og tækni“ þar sem stelpum úr 9. bekkjum grunnskóla er boðið í háskólann og jafnframt í tæknifyrirtæki.

Markmiðið með verkefninu er að vekja áhuga þeirra á ýmsum möguleikum í tækninámi og tæknistörfum, brjóta niður staðalímyndir og sýna þeim fjölbreytileikann sem einkennir tækniiðnaðinn.

„Stelpur og tækni“ er alþjóðlegt verkefni sem kallast „#GirlsinICT Day“ á ensku og þá er sérstakur dagur tekinn frá í apríl og haldið upp á hann með ýmsum skipulögðum viðburðum víða um Evrópu á hverju ári. Þetta er framkvæmt með styrk frá ITU (International Telecommunication Union) og Evrópusambandinu í tengslum við Digital Agenda-áætlunina. HR hefur haldið utan um daginn hér á landi frá upphafi.

Konurnar sem mynda helming framkvæmdarstjórnar Wise, tóku vel á móti stelpunum er þær mættu, og kynntu fyrir þeim fyrirtækið. Þær lögðu áherslu á að hjá Wise er stefnan að hafa sem minnstan mun á hlutfalli kynjanna en um 45% starfsmanna eru konur. Meirihlutinn af þeim eru tæknimenntaðar, s.s. forritarar, tölvunarfræðingar, þó einnig séu konur með annan bakgrunn.

Í heimsókninni til Wise fengu stelpurnar innsýn inn í heim tölvuforritunar þar sem þær fengu kennslu í forritun í NAV umhverfi og einnig fengu þær að kynnast starfsmönnum nánar sem sögðu þeim frá því hvernig þær komust að þeirri niðurstöðu að fara í störf í upplýsingatækni.

Voru þær svo leystar út með gjöfum og þökkum við þeim kærlega fyrir komuna.