Wise og Icedistribution undirrita samstarfssamning um sölu á Microsoft skýjalausnum

Wise og Icedistribution hafa undirritað samstarfsamning um sölu á Microsoft skýjalausnum. Með því bætast við nýir valkostir í „skýja-flóruna” og Wise eykur jafnframt framboð þjónustuþátta til viðskiptavina sinna. Meðal lausna í skýinu er aðgangur að Microsoft Dynamics NAV, einu mest selda bókhaldskerfi á Íslandi í dag, hýsing og Microsoft lausnir á borð við Office 365, InTune og OneDrive.

Icedistribution

Icedistribution er nýtt og ört vaxandi fyrirtæki sem náð hefur mikilli útbreiðslu á evrópskum markaði. Höfuðstöðvarnar eru á Íslandi en fyrirtækið sérhæfir sig í þjónustu og dreifingu á hugbúnaði. Icedistribution er í eigu Crayon Holding í Noregi. Starfsmenn eru rúmlega 700 um allan heim.

Fjölbreyttara úrval lausna

Sem viðurkenndur dreifingaraðili á skýjalausnum styður Icedistribution við Wise með fjölbreyttara úrvali af Microsoft skýjalausnum en áður hafa verið í boði. Crayon er eitt fimm fyrirtækja á markaði í Evrópu, Mið-Austurlöndum og Afríku (EMEA) sem er með Microsoft Cloud Solutions Provider, CPS T1 og CPS T2 réttindi og jafnframt eini aðilinn á Íslandi sem býður hvoru tveggja. Það gefur þeim færi á að bjóða upp á fjölbreyttari valkosti en aðrir söluaðilar. Fyrirtækið er eitt af framsæknustu fyrirtækjum í heiminum í dag hvað varðar hugbúnaðarráðgjöf og bestun.
Wise hefur nýlega opnað skrifstofu í Noregi sem er eitt af stærstu markaðssvæðum Icedistribution. Samstarfið hefur því alla burði til að skila viðskiptavinum samkeppnisforskoti með fjölbreyttari lausnum, sveigjanleika og hraða í síbreytilegu umhverfi.

Nýir möguleikar fyrir viðskiptavini Wise

Tölvuský bjóða upp á meiri sveigjanleika og hagræðingu í rekstri. Fyrirtæki þurfa því ekki að fjárfesta í dýrum búnaði, eru alltaf með aðgengi að nýjustu útgáfu og notendafjöldi er sveigjanlegur frá einum mánuði til annars. Wise býður upp á hýsingu á gögnum, hugbúnaði og kerfum í skýi Microsoft auk aðgengis að þjónustuborði hjá Crayon, þar sem hægt er að fá tækniaðstoð og aðstoð við einfaldari aðgerðir. Þetta er nýr valkostur.
„Lausnir í skýjunum eru sífellt að verða vinsælli, en Wise hefur boðið upp á bókhaldskerfi, viðskiptalausnir og sjávarútvegslausnir í áskrift um nokkurra ára skeið. Við fögnum þeim tækifærum sem samstarf okkar felur í sér fyrir viðskiptavini okkar,”segir Hallgerður Jóna Elvarsdóttir, sölustjóri hjá Wise lausnum.

Um Wise

Wise var stofnað árið 1995 og er í dag einn stærsti söluaðili Dynamics NAV á Íslandi. Starfsmenn eru rúmlega 80 og viðskiptavinir eru um 500 talsins víðs vegar um heiminn. Velgengni Wise á mörkuðum innanlands og utan byggir á heildstæðri þekkingu og reynslu af Dynamics NAV og öflugum sérlausnum fyrir rekstur á sviði sjávarútvegs, sveitarfélaga, flutninga og viðskipta.